Mo katte keñe, umuikeddekli buihotte duddiiholi mobetteku Prañu, doro idsatte krodse Wakonam, wanybihekie anroa mono hanrabuyeloboe wanyedde hikiea diddili no Ñikebuye, doro mohabbeihoku Prañua. Doro ibbe uttua bihe ukie barinanke modzeku Krodso iddeho didziddea, ubbikli ho tekie mo tutte dibbelia doro ippo iddeho dupele dupalia, inneba dupali dadumuikedde weyadseyedde, doro barinam mono anroke idsohoba dhibuye hammui.
Inedsokie no Krodso idze, hwinakebekli do nedso ande politam nelu, moro doro klikiekli hany idziddea doro muittea ibette do iddhi anrabuye, hwikakli barinanke do boeddo dupalia, katteloboe dadimme hany ubbikie iñaa, dimmepeham dupalia, mepehante mokaku doro kaiko leidse. Dikienne barinanke inneba dupalia, ubbikli piwankie adsia, ibenne hany anroke wankro bo monneku iña mo tupele anrabuye. Hammoboero, do benne molikie dumuikeddeli barinam ihuddaa.
Hwinakebekiekli Krodso ibeiba do woro, rodde ibannanre ho ne 7 (tulu) yakia mokiku hany hembuppi, do kedze, bo
wayuidze, doro iboetoddi Krodso immeba: "Aindheddi! Aindheddi!", immekli doihi mohahenku barinam. Mo imme wro, iha homme: "ukipuemondo mono aindhe nelu", wro homme iha iworo 7 diyakilia, anran bukipri krodseba iha:
Danrampali puihawasu
Iwiddeddhui anram Prañu
Idsokie bahe do wrobui
Pradzodde Dsebuyeddeddhui
Ipennekli, motto buyedde, iddeho tulu modhidseku diyakilia mono Aramanasua, ipennekli dumuikeddeli mono Dsebuyeddeddhui kedzeba, udedapihatte hoho hany barinanke, Dsebuyeddeddhui doro imme: "boero bihe dibeli, morokie ? Krodso ditammanhemboeroidzeli bo bannahoyaa", barinanke wolidzepemmui mokeddekiekuba doro wanybihe imme: "no mebuyekie, hiwikannu añaidza mo ipatteddi ?", ippo Dsebuyeddeddhui ho tulu hahabuyekliba dibannanreklili aindhea mo leidse, imme dokoho diyakili Dhihewi, bo Dseho mobetteku Ronattea: "hirande Dsebuyeddeddhui, danlan onadse hianra wankie ammi kaya ro ?", iklikie pli le Dsebuyeddeddhui hommeba barinanke: "No moro, awi tuoñe horo awika kaidza nelu".
immui bihe batti inabitte Krodso dadiwika Dsebuyeddeddhui dupaliaba, mo katte wro, iwikli wanybihekie diwikali kangriidze iddeho uheridze bukuba, dadiwidde idzebuppi Poidze. Doro idsoho mobuiku kuibo Poidze hammui, inaro ideddehehekli idzenea ipatte bo ipatte, dadwapriddho do idzekie ho tulu yakia, mo katte wro do katteloboe ikotto ulekidi, katteloboe ubbikli dumuikeddeli dupali motendonku bo adsea buye idsohoba deñea moadseku, "moronukie plo anro andsehidzete, kohoddi ?" immedsebukli.
Ne ukie bihe, doro anrabuye modzeyaku, ho mobuppiku doro anranyeddea bidze bulemme mo ippo Krodso, moroba mono ubbi, doro kedde Dsebuyeddeddhui hany diyakilia Poidzeba diwiwoddikotunnuloboeli "doro boetoddi koña", immeddhui motuihoku hudda Prañua hany eriwi hanra budsebu anrabuye, kattekie doro iklikie hany boetoddi koña no buyeidzekie.
Witane araa bo buiho ñaheddea hany Prañu doro ukaiko idotte hanra nanhe, doro idaddi idzeyatte mo iddhi Krodso Poidze, heriwikli dokoho kattekie inanhe didseho meihokli dokoho kattekie doro natte mo didsohotte, Dsebuyeddeddhui, tulu yakiaba diheridzeliba doro iddoa, dumuikeddeli diyakili kedze didaddia mo wan'a bummui, iwika dokoho Krodso do bui. Mo iyeddette nanhettu, doro mo dseka ihabbeiholoboe Prañua buihotte Prañu, momikeddeku bo dumikeddeli anranyedde iñu mowitanedikeku Dzakruttu dehem, Nanhe Dzakupem. Nanhe Dzakupem doro mehi iddeho immettea dipokieli bo anra: "hamaple bihe hikatte hany onadse, hiñura dimalidzaliaba", Dsebuyeddeddhui mehikeñe ilambitte Dzakupem: "hamaple malidza, morokie nanhe ?", dimalidzaloboeli itua mekakie dammeba, Poidze doro dzeyaidze, kattekie mo dimmedsebutte doro mui medsebu iddotte mo malidza.
Dibarinampali malidza
Umanran dsoho, mono dsoya
Muiddo dzeya do loboe dseho
Wanybihe manran bo Nhinho
Autor da matéria: Suã Ari Llusan
Nenhum comentário:
Postar um comentário